O Concello de Ordes abre a licitación para o contrato de subministro de biomasa

O presuposto anual ascende a 77.440 € para as caldeiras da piscina Iván Raña e do campo de fútbol de Vista Alegre

No día de hoxe o Concello de Ordes anunciou a licitación para o contrato de subministro de biomasa destinado inicialmente ás instalacións municipais da piscina Iván Raña e do campo de Fútbol de Vista Alegre. O obxectivo principal do prego é asegurar o combustible necesario para o correcto funcionamento dos sistemas de calefacción e auga quente, garantindo a máxima eficiencia e sustentabilidade enerxética. O presuposto anual desta contratación ascende a 77.440 € (IVE incluido), establecéndose o prazo límite de presentación de ofertas este 27 de xullo. O valor estimado do contrato sitúase en 211.202,75 euros.

O contrato inclúe o subministro de pellet de madeira, o transporte ata os puntos indicados, a retirada das cinzas e o control continuo das necesidades das caldeiras para evitar calquera interrupción do servizo. O acordo tamén prevé a posibilidade de ampliar o subministro a outros edificios no caso de que fose necesario. Para garantir o óptimo rendemento e coidado das instalacións, o pellet deberá contar obrigatoriamente co certificado de calidade ENplus A1 (baseado na Norma UNE-EN ISO 17225-2:2014), o que asegura que provén de residuos de madeira virxe non tratados quimicamente. O prezo máximo fixado é de 320 € por tonelada (IVE excluído).

O Concello estima un consumo orientativo de 175 toneladas para a piscina climatizada e de 25 toneladas para o campo de fútbol, supeditado sempre ás necesidades reais do día a día. As empresas licitadoras deberán achegar xunto coa súa oferta un certificado que garanta a súa capacidade de abastecemento durante toda a vixencia do contrato, así como dispoñer de camións con sistema de transvase de carga directa aos silos.