Xornada de conciliación o 4 de maio para a rapazada dos CEIP Campomaior e ADR Castelao

A inscrición do One-Day Camp estará aberta ata o próximo 29 de abril

Co obxectivo de seguir facilitando a conciliación da vida familiar e laboral, o Concello de Ordes organiza unha nova edición do One-Day Camp. A xornada terá lugar o luns 4 de maio co fin de cubrir as necesidades das familias da rapazada de entre 3 e 12 anos escolarizada nos CEIP Campomaior e ADR Castelao.

Cada un e unha deles/as gozarán dun amplo programa de actividades lúdicas e educativas que inclúe xogos deportivos e tradicionais, obradoiros de música e movemento, así como diversos traballos manuais. Sempre baixo a supervisión de monitores/as.

O prezo da actividade é de 4 €, cunha bonificación do 50% de desconto para as familias numerosas. O prazo para anotarse permanecerá aberto ata o vindeiro mércores 29 de abril a través do Departamento de Educación, situado no primeiro andar do Concello (Alfonso Senra, 108). O formulario xa está á disposición da veciñanza na web municipal www.ordes.gal. Para calquera aclaración tamén se pode chamar ao teléfono 981680004 (ext. 3).

     Ademais, a través da Escuela ConTalento tamén se poden contratar outros servizos complementarios como o de madrugadores de 7.30 a 9 h (3 €), almorzo (2,75 €), mediodía de 14 a 15.30 horas (3 €) e xantar (6,50 €).

O trámite pódese facer no enlace .