Abre a licitación para a mellora do pavimento e canalizacións en distintas vías municipais na parroquia de Parada

O importe base ascende a a algo máis de 467.000 euros

Dende o Concello de Ordes iníciase o procedemento de licitación para as obras de varias pistas e vías municipais. Unhas actuacións que na súa meirande parte se centran na reparación do pavimento e en obras de abastecemento. En conxunto o investimento ascende a 467.370,52 (IVE incluído). As ditas obras están incluídas no POS+2025, sendo aprobadas no pleno que tivo lugar o pasado 30 de xaneiro. O prazo de recepción de ofertas estará vixente ata o 22 de decembro de 2025.

A mellora do pavimento realizarase aplicando elementos como mestura bituminosa e aglomerado en quente. Tamén se repararán as fochas con grava e tratamento asfáltico semiprofundo, ademais da canalización do abastecemento con tubos de polietileno e coa valvulería correspondente. No caso das pluviais empregarase tubaxe corrugada.

A pista que vai do Pazo a Castenda conta cun investimento de 182.286,82 €, incluíndo 5 cunetas tendidas con grixo e formigón. Nalgúns puntos da pista que vai da Igrexa-Pazo ao lugar do Mouro, orzamentada en 35.893,65 €, colocarase bordo de granito e realizarase un sobreancho mediante grixo e formigón desactivado. Os traballos de mellora da pista do Castro e do interior da Aldea están orzamentados en 50.227,82 €, os da Agrela ascenden a 10.355,31 €, mentres que os do acceso no Piñón suporán 29.118,51 €. (Cantidades ás que lle hai que sumar o IVE, beneficio industrial, máis os gastos xerais, de xestión de residuos e de seguridade e saúde).

Para concluír levarase a cabo a limpeza de gabias e salvagabias para unha correcta drenaxe, a sinalización horizontal co pintado de liñas de bordo e símbolos, ademais da colocación de sinais naqueles puntos nos que sexa preciso.