Regresa o programa universitario Camiños de Coñecemento e Experiencia para maiores de 50 anos.

Terá lugar maioritariamente no mes de abril e o prazo para apuntarse xa está aberto. Abordaranse temas relacionados coas especies arbóreas da comarca, a historia da fotografía e o culto xacobeo

Convocado un novo ciclo do programa universitario para persoas maiores de 50 anos. A Vicerreitoría de Estudantes e Cultura da Universidade de Santiago de Compostela, a Consellería de Política Social da Xunta de Galicia e a Deputación da Coruña unifican o seu esforzo xunto co doutros 13 concellos da provincia, entre eles Ordes, para ofrecer a posibilidade de vivir a experiencia de formar parte de clases e sesións formativas universitarias. As persoas interesadas en participar xa se poden apuntar no primeiro andar do Concello.

As primeiras citas do programa Camiños de Coñecemento e Experiencia, proxecto de democratización do coñecemento están postas para os vindeiros luns e martes, 21 e 22 de abril. A colaboradora Blanca Fraga falará das especies arbóreas da comarca. Os seguintes días, mércores e xoves, a investigadora (Dpto. Pedagoxía) Katia Cino abordará a historia da fotografía: unha viaxe dende a cámara escura ata a era dixital.  A última das temáticas centrarase na orixe do culto xacobeo: historia e lenda e virá da man do profesor Victoriano Nodar os venres 25 de abril e 2 de maio. O horario de todas estas clases será de  16.30 a 18 horas no salón de plenos, situado nos baixos da alameda.

Ademais do de Ordes, este IV ciclo dos Camiños de Coñecemento e Experiencia tamén se desenvolverá nos seguintes municipios: Arzúa, Porto do Son, Muros, O Pino, Outes, Padrón, A Pobra do Caramiñal, Rianxo, Ribeira, Teo e Vedra.