BELÉN DO CAMPO PON EN VALOR OS OBRADOIROS PARA DESEMPREGADOS DA COMARCA DE ORDES QUE A XUNTA FINANCIA CON MÁIS DE 1,2 MILLÓNS DE EUROS 

• A delegada da Xunta visitou os talleres de formación liderado por Ordes con Frades e Mesía e o organizado pola Mancomunidade de Ordes (Ordes, Oroso, Tordoia, Trazo, Frades, Mesía e Cerceda)
• A representante do Goberno autonómico animou aos 40 alumnos participantes, nestes dous cursos, a aproveitar estes obradoiros xa que adaptan a oferta formativa ás demandas e necesidades de contratación da zona

 A delegada da Xunta, Belén do Campo, acompañada pola presidenta da Mancomunidade de Ordes, Susana García, e polo director territorial da Consellería de Emprego, Comercio e Emigración, Juan José Couce, visitou os obradoiros de emprego “Brañas de Illó-Río Samo VII” organizado por Ordes, Frades e Mesía e o da “Mancomunidade Ordes IV” no que participan os concellos de Ordes, Oroso, Tordoia, Trazo, Frades, Mesía e Cerceda. A representante do goberno autonómico estivo acompañada polo alcalde de Oroso, Alex Doval, polo alcalde de Tordoia, Antonio Pereiro, pola alcaldesa de Trazo, Fina Suárez, pola alcalde Frades, Roberto Rey, polo alcalde Mesía, Mariano Iglesias e polo alcalde de Cerceda, Juan Manuel Rodríguez. 

A delegada destacou que estes talleres de emprego teñen unha duración de 9 meses, grazas a un investimento da Xunta de máis de 820.000 euros en ambos talleres, nos que as 40 alumnas e alumnos realizarán intervencións de  interese público nestes concellos.

O primeiro dos obradoiros do Concello de Ordes está centrado en actividades auxiliares en conservación e mellora de montes e en actividades auxiliares en viveiros, xardíns e centros de xardinería e o que leva a cabo a Mancomunidade céntrase en pintura industrial en construción e instalación de elementos de carpintaría. 

A representante do Goberno autonómico puxo en valor as actuacións que realizarán os alumnos na parte práctica destes cursos. Concretamente, os que se formarán en mellora de montes e xardinaría realizarán 32 intervencións de mellora en parques, áreas recreativas, áreas deportivas, viveiros municipais, paseos fluviais, prazas, piscinas públicas, fincas municipais e campos de fútbol nos municipios de Ordes, Frades e Mesía e as alumnas e alumnos do taller de pintura industrial en construción e carpintaría realizarán rehabilitacións na estación de tren de A Pontraga-Parada en Ordes, no local social de Aiazo en Frades, no local social de Oa  en Trazo e na estación de ferrocarril de Trasmonte en Oroso.
Belén do Campo destacou que “os obradoiros de emprego permiten dotar a nosa poboación activa de formación de calidade ao tempo que desenvolven un traballo produtivo de utilidade pública ou interese social, coa posibilidade de acreditalo a través dos certificados de profesionalidade”. “O obxectivo –incidiu– é seguir mellorando o emprego nos concellos galegos, especialmente nos do rural, adaptando a oferta formativa ás demandas e necesidades de contratación da zona”. Neste senso, animou a todos os participantes a aproveitar a formación que van a recibir para buscar traballo e incluso para iniciar o seu propio negocio “porque cando rematedes estes 9 meses estaredes preparados para traballar nuns sectores que precisan, nestes momentos, de profesionais cualificados”, subliñou.
Nos obradoiros de emprego a  Xunta de Galicia encárgase de financiar a formación profesional para o emprego (medios, materiais, contratación de persoal...), así como os custos salariais derivados dos contratos de traballo subscritos co alumnado.

Obradoiros 24-25

A representante do Goberno autonómico informou que a comarca Ordes conta, nesta convocatoria 24-25, con 3 obradoiros duais grazas a un apoio da Xunta de máis de 1,2 millóns de euros para formar a 60 alumnas e alumnos. O organizado por Ordes, con Frades e Mesía, o liderado pola Mancomunidade de Ordes e un terceiro taller organizado por Trazo, Cerceda, Oroso e Tordoia
Na provincia da Coruña están aprobados 23 obradoiros de emprego duais, grazas a un investimento de máis de 9 millóns de euros para formar 440 persoas sen traballo.
Finalmente, Belén do Campo subliñou que en toda Galicia os obradoiros de emprego duais supoñen un investimento por un importe de máis de 36 millóns de euros para un total de 87 accións deste tipo coas que se prevé beneficiar a máis de 1.700 desempregados.