Ordes acolle unha sesión informativa sobre as axudas en zonas de transición xusta 

Esta mañá Nuria Álvarez, responsable territorial para Galicia do plan, informou de primeira man a un grupo de empresarios/as da comarca sobre a nova convocatoria destas achegas

Esta mañá, na Casa da Cultura de Ordes, tivo lugar a xornada informativa sobre as axudas en zonas de transición xusta (Zona de Transición Xusta de Meirama). O espazo escollido foi o auditorio María del Carmen Regueira Amor, situado .

Unha iniciativa dirixida aos empresarios/as da zona e que arrancou coa benvida do alcalde de Ordes, José Luis Martínez Sanjurjo. Nuria Álvarez, axente de Territorio en convenios para as Zonas de Transición Xusta en Galicia, foi a seguinte en dirixirse ás persoas congregadas. A todas elas lles deu boa conta da nova convocatoria de achegas destinadas ás empresas situadas nestas áreas. Exemplificativo foi o testemuño de Manuel Freire Ferro, xerente de Colchón Durmet. Transmitiu a súa experiencia como empresario beneficiario das axudas concedidas no ano 2023 polo Instituto para a Transición Xusta. Finalmente cada un dos presentes tivo ocasión de expoñer as súas dúbidas respecto da tramitación, compromiso ou calquera outro aspecto relacionado con estas achegas. 
     
O convenio Transición Xusta de Meirama formúlase como unha medida que dá resposta e apoio aos impactos resultantes do peche da central térmica de Meirama nos municipios de Ordes, Cerceda, Tordoia, A Laracha e Carral. O seu obxectivo prioritario pasa por crear e manter actividade empresarial e emprego nos territorios afectados pola transición enerxética. Tamén fixar poboación en zonas rurais e promover unha nova e diversa actividade enerxética.

Na organización desta xornada colaboraron tanto o Concello de Ordes como a Asociación de Desenvolvemento da Comarca de Ordes (Asdecomor), estando organizada pola Vicepresidencia Cuarta do Goberno e o Ministerio para a Transición Ecolóxica e o Reto Demográfico (Instituto para a Transición Xusto).