Ordes investirá máis de 360.000 euros nunha obra na cidade deportiva de Vista Alegre e na adquisición de bens inmobles
O pleno aproba unha modificación de crédito orzamentario -suplemento de crédito- para instalar un novo céspede artificial no anexo de Vista Alegre e para facerse cunha parcela con destino a vial no parque empresarial de Merelle e co campo de fútbol do Mesón
O pleno ordinario de marzo arrancou coa aprobación dunha modificación de crédito orzamentario -suplemento de crédito- para acometar unha obra e a adquisición de dous bens inmobles. Así, cos votos a favor do goberno local ao que se sumaron os nacionalistas, procederase en próximas datas coa licitación da renovación integral do céspede artificial do campo de fútbol anexo da cidade deportiva sita en Vista Alegre. Previamente á substitución do manto instalado xa no ano 2009 por un novo, vaise regularizar o firme e colocar unha base elástica intermedia para así mellorar as condicións para a práctica deportiva. O investimento total ascende a 271.860,08 euros. As dúas concelleiras do PsdeG-PSOE de Ordes abstivéronse pola súa preferencia por un campo de herba natural.
Con esta medida o Concello tamén ten luz verde para a adquisición dos terreos do campo de rútbol do Mesón do Vento por un importe de 36.960,75 euros. Ponse así punto e remate a un proceso que leva anos de tramitación. Xa no ano 2020 o concello ofertara a Hacienda ata 32.000 euros, pero non foi resolta a adxudicación. En datas recentes nunha nova subasta o concello igualou a poxa de 28.000 euros, e tras intentar valer o dereito de tanteo e ser derivado por Hacienda aos xulgados ou a unha expropiación forzosa, optouse por negociar a adquisición co adxudicatario final, cuestión resolta cun compromiso acadado a finais do ano 2024, de xeito que no mes me maio se poida proceder a compravenda do campo en escritura pública pasando a formar parte do inventario municipal dentro dun prezo razoable e xustificado.
Tras o pago de 53.538,98 euros, tamén pasará a ser de titularidade pública unha fracción da parcela 48 situada no polígono empresarial de Merelle. Cunhas dimensións de 1.029 m² sitúase concretamente a carón doutros terreos municipais onde se ubican equipamentos como a gardería, o parque de bombeiros e o local de protección civil; e o seu destino é de vial dacordo ao PXOM para comunicar o urbanizable S12 co actual polígono.
Co consenso de todos os membros da corporación aprobouse tamén a ratificación da adscrición demanial a favor do Concello da marxe esquerda dun tramo da estrada municipal DP-5903 que une Ordes con Portomouro por Pontechonia (PQ 1+365 ao PQ 4+435). Un acordo que marca o punto de inicio para que dende o ente local poidan inciar os trámites de cara á licitación das obras previstas polo Concello nesa zona con fondos procedentes do ITJ.
O PsdeG-PSOE de Ordes abriu a quenda de mocións vendo como o grupo de goberno botaba por terra a posibilidade de debater a adhesión de Ordes á Rede de Entidades Locais da Axenda 2030 para o desenvolvemento sostible. O rexedor, José Luis Martínez Sanjurjo, xustificou a súa postura coa falta de garantías por parte do goberno central á hora de financiar as obrigas derivadas da adhesión. Avalou o compromiso mediambiental dos seus indicando que “Ordes xa forma parte do pacto das alcaldías polo clima, o cal é posible grazas ao investimento económico aportado por parte da Xunta de Galicia”.
Prazas aparcamento
A que si prosperou foi a moción en relación coas prazas de aparcamento para persoas con diversidade funcional. Inicialmente solicitábaselle ao Concello a súa adaptación á normativa vixente no referente ás dimensións, ademais de aumentar o seu número e executar tarefas de repintado e a instalación de sinalización vertical. A moción foi aprobada por unanimidade ao aceptarse a emenda de substitución plantexada dende o goberno. Puntualizando incialmente que o Concello de Ordes carece de competencias para poder executar moitas das peticións plantexadas, propúsoxe solicitar á asistencia técnica municipal a redacción dun proxecto valorado para adaptar as ditas prazas á normativa vixente co gallo de incluír a súa execución nos orzamentos do ano 2025 ou nos sucesivos. Ademais, tamén se instará a Deputación Provincial da Coruña, a Xunta de Galicia e a Demarcación de Estradas do Estado en Galicia a que o fagan nas prazas que se atopen en vías da súa competencia e titularidade.
Outra moción que foi rexeitada cos votos do goberno local foi na que o BNG solicitaba, en base a inclusión da zona do encoro de Vilagudín na orde APA/2442/2006 do 27 de xullo pola que se establecen medidas específicas de protección en relación á influencia aviaria, unha serie de acordos. Entre outros, a elaboración dun plan de actuación e prevención por parte da Xunta, ou o impulso de liñas de axudas para axeitar as instalacións ou para compensar perdas económicas. Novamente foi o alcalde quen explicou o rexeitamento a urxencia desta medida. Indicou que a día de hoxe xa existe un programa de vixianza fronte a gripe aviaria desenvolvido polas consellerías do Medio Rural e de Medio Ambiente e Cambio Climático.
Mancomunidade de Ordes
Dende o BNG, presentaron outra moción, esta vez para o impulso da Mancomunidade de Municipios da Comarca de Ordes. O seu plan baseouno na ampliación dos servizos que xa están mancomunados a día de hoxe. Como exemplo, entre outros, a recollida do lixo, a recollida de papel e cartón, o guindastre e depósito de vehículos, as rozas e mantemento de estradas ou o asesoramento xurídico aos concellos etc.
Tanto o PsdeG-PSOE de Ordes como o equipo de goberno votaron en contra. Noelia Ribadas, voceira socialista, manifestou coincidir cos nacionalistas na análise da infrafinanciación das entidades locais, pero en desacordo con que a solución pase por mancomunar servizos. Incluso aludiu á necesidade de que algúns deles, como atención temperá, fose xestionado directamente polo propio Concello dado o número de usuarios e usuarias.
Susana García, presidenta da Mancomunidade de Ordes, fundamentou a súa negativa indicando que “a casuística de Ordes dista moito da de outros concellos que non son cabeceira de comarca e teñen menos de 5.000 habitantes”. Puntualizou a tamén concelleira local que “a Mancomunidade de Ordes ten os seus propios estatutos que regulan como se organizan e se prestan os servizos segundo as posibilidades de cada municipio. De feito xa se teñen feito análises de viabilidade e custos para servizos como o guindastre ou a canceira sen que se chegara a un acordo”, manifestou. Botando unha ollada ao pasado García concluíu lembrando que “inicialmente, cando se fundou a mancomunidade, xa se mancomunara o servizo de recollida de lixo e non resultou positivo. Caeu polo seu propio peso”.