Abre o prazo para inscribirse para as actividades de conciliación do Entroido
O Carnival Camp terá lugar os días 28 de febreiro e o 3 e 5 de marzo
O programa de conciliación organizado polo Concello de Ordes de cara ás vacacións escolares de Entroido terá lugar os días 28 de febreiro e 3 e 5 de marzo no caso dos CEIP Campomaior e O Mesón do Vento. Para o CEIP Alfonso Daniel Rodríguez Castelao as datas serán unicamente o 3 e 5 de marzo en base aos calendarios escolares de cada centro.
Poderán participar nenos e nenas escolarizados con idades que abrangan dende os 3 aos 12 anos. O horario inicial será dende as 9 ata as 14 horas e constará de diversas actividades como xogos tradicionais e deportivos, música e movemento, obradoiros de creatividade, traballos manuais, ademais de festas de disfraces entre outras. Tamén se ofrece a posibilidade de contratar servizos complementarios como madrugadores con almorzo ou comida ao mediodía. Neste caso haberá que facer os trámites na páxina web www.escuelacontalento.es/campamentos.
O prazo para inscribirse no Carnival Camp estará aberto ata o 26 de febreiro no departamento de Educación do Concello de Ordes (981680002 ext 3). O prezo oscilará entre os 12 e os 8 euros dependendo do centro académico, podendo beneficiarse dun desconto do 50% as familias numerosas. A ficha de inscrición xa se pode descargar nas redes sociais do propio Concello.
