Licitación obras de diversos viais do rural ordense de Pereira e Bean
O Concello de Ordes prevé un investimento total que supera os 230.000 euros para intervir en zonas como O Curro, A Lamela, O Regueiro, Nouche ou Fondo da Aldea.
Por un importe total de 191.648,04 euros (231.894,13 € I.V.E. incluído) o Concello de Ordes vén de abrir o prazo de licitación para un total de 5 actuacións de firmes en distintos viais do termo municipal.
Na vía que une o Curro coa N-550 (Pereira) melloraranse varios treitos (270x4 m, 35x4,5 m, 45x5 m e 25x5 m) máis 200 m² de abanicos. Aplicarase aglomerado quente tras eliminarse as fochancas con grava e tratamento asfáltico. Ademais, ao longo de 130x5 m aplicarase zahorra e formigón. Tamén se canalizarán as augas pluviais con 305 m de tubo, 16 arquetas e 5 pozos de rexistro.
Na pista do cruce de Nouche ata o límite de Senra (Bean) intervirase na capa de rodaxe de dous tramos (355x4 m e 670x4,5 m). O mesmo se fará en tres seccións de accesos interiores da zona do Regueiro (Bean) (270x3 m, 60x3 m e 210x3 m). Na zona da Lamela (Pereira) traballarase nun tramo de 175x3,6 m.
En todos estes puntos contémplase a limpeza de gabias e salvagabias e a correcta sinalización horizontal, ademais da colocación das correspondentes sinais.
A derradeira intervención será nun acceso de 250x4 m a unha das granxas situadas en Fondo da Aldea (Pereira) co necesario acondicionamento noutros 25 m² de abanicos.
