Preto de 800 persoas asisten á xuntanza de maiores
O Concello de Ordes homenaxea á veciñanza de máis idade cun xantar popular que contou coa presenza do director xeral de Maiores e Atención Sociosanitaria e da maioría dos membros da corporación local
Preto de 800 persoas participaron esta fin de semana na xuntanza de maiores organizada polo Concello de Ordes. Trátase dunha celebración coa que o ente local homenaxea cada ano aos veciños e veciñas de maior idade.
Nesta ocasión contouse coa presenza de D. Antón Acevedo Prado, director xeral de Maiores e Atención Sociosanitaria, así como coa dos membros do goberno local, co alcalde José Luis Martínez Sanjurjo á cabeza. Tampouco se quixeron perder a cita a maior parte dos restantes membros da corporación, así como o exalcalde Teodosio Martino.
Este ano o lugar escollido para a celebración foi o pavillón Castelao II, onde a partir das 13.30 horas tivo lugar unha misa solemne seguida dun xantar composto por empanada, polbo, xarrete, tarta de Santiago e café. Tras isto chegou o momento da música e do baile. No exterior do polideportivo un grupo musical agardaba por todas e todos os presentes, que o pasaron en grande ao ritmo de pasodobre e música tradicional.
