Últimas dúas prazas para o programa xuvenil Galeuropa da Mancomunidade de Ordes
A Mancomunidade de Municipios da Comarca de Ordes anuncia as vacantes das dúas últimas prazas ofertadas no Programa de Mobilidade Transnacional Xuvenil ‘Galeuropa’ 2018. Concretamente corresponden a Derry, no Reino Unido. As persoas interesadas poderán inscribirse ata o vindeiro 31 de agosto. A dita iniciativa está dirixida especialmente ás que teñan entre 18 e 30 anos e estean inscritas no Sistema Nacional de Garantía Xuvenil, cuxo cargo vai ligado ao Programa Operativo de Emprego Xuvenil.
Galeuropa ofrécelles a posibilidade de aprender idiomas e realizar prácticas en empresas de distintos ámbitos e sectores durante un período de dous meses e medio a aqueles mozos e mozas da comarca que o desexen. En total serán 100 horas mensuais destinadas ao ámbito laboral, ademais das que se programarán para a aprendizaxe do idioma.
Entre outros as persoas demandantes terán que cumprir os requisitos de non ter traballado nin recibido accións educativas nin formativas no día natural anterior ao momento de recibir a actuación. Tampouco poderán participar as persoas que resultaran beneficiarias en convocatorias anteriores do programa.
Tanto no Servizo de Emprego como no Servizo de Prevención de Drogodependencias da Mancomunidade de Ordes, departamentos responsables da posta en marcha e o desenvolvemento do dito programa na comarca ordense, pódese tramitar a inscrición ou solicitar información, tanto no que se refire ás axudas individuais como ás outorgadas por administracións locais ou mancomunadas. Tamén se pode facer uso dos teléfonos 607642863 e 981680679, ou ben do correo electrónico galeuropa@mancomunidadeordes.org.
