Ordes estreará o alumeado de Nadal o 5 de decembro

Ese día AECOR encherá o parque da Constitución de maxia coas actuacións de Yago Barral, Álex de las Heras, Sena e Apolo jr.

O vindeiro 5 de decembro as rúas de Ordes lucirán dun xeito moi especial debido ao acendido do seu sistema de iluminación de Nadal. A veciñanza contará nesta ocasión con preto de 300 elementos compostos de luces led de distintas cromáticas, cos que se animarán tanto o centro urbano como as parroquias. 

Tamén o día 5, neste caso da man de AECOR, a maxia será a protagonista grazas ás actuacións dalgúns dos principais e máis afamados magos do panorama actual. Será a partir das 18 horas cando o parque da Constitución sirva de escenario para Yago Barral, Álex de las Heras, Sena e  Apolo jr. Unha cita chea de sorpresas que deixará a todos e todas coa boca aberta cos números máis impresionantes. Unha cita na que colaboran tamén o Concello de Ordes e a Xunta de Galicia.