Duncan de palleiro, protagonista do Outono Cultural

Máis de 60 persoas acudiron á Casa da Cultura de Ordes para poder ver a obra teatral Duncan de palleiro. Unha peza para toda a familia na que se narran as peripecias do can con maior presenza no rural galego. A cita formou parte do programa Outono Cultural, o cal se desenvolverá ata o vindeiro mes de novembro e que achegará ata Ordes diversas funcións teatrais para todos os gustos. 

Para a próxima cita haberá que agardar ata o 9 de outubro. Ese día ás 20 horas na Casa da Cultura está programada a obra Runnig: Unha suorenta comedia. Dirixida a un público a partir dos 12 anos, nela dous actores métense na pel de 20 personaxes distintos para, en clave de humor, darlles vida a dúas familias onde están presentes os roles e as situacións máis cotiás da actualidade. 

Para poder asistir ás funcións é imprescindible inscribirse con antelación e preferiblemente facendo uso do correo ordescultura@gmail.com. Tamén chamando ao departamento de Cultura ao 981680002 (ext. 4). Terán preferencia as persoas empadroadas de Ordes. Ademais do nome, apelidos e teléfono de contacto haberá que especificar o título das obras ás que se quere acudir como público. En todo momento haberá que facer uso da máscara. 

Outono Cultural é un programa organizado polo departamento de Cultura do Concello de Ordes e que conta coa participación da Deputación da Coruña, Xacobeo 2021-22 e Gadis.