Comezan as obras de mellora da estrada Ordes-Cerceda cun investimento de 2,3 millóns de euros

A conselleira de Infraestruturas e Vivenda, xunto co delegado territorial da Xunta na Coruña, Ovidio Rodeiro, e o alcalde de Ordes, José Luís Martínez, supervisou hoxe o comezo da actuación que reforzarán a seguridade nesta vía

A XUNTA INICIA HOXE AS OBRAS DE MELLORA DA ESTRADA QUE VAI DE ORDES A CERDEDA, POR MERCURÍN, CUN INVESTIMENTO DE 2,3 MILLÓNS DE EUROS, CO OBXECTIVO DE REMATALAS O VINDEIRO ANO

• Vázquez Mourelle sinala que este proxecto achegará seguridade e comodidade nos desprazamentos dos veciños de Ordes e Cerceda; dos traballadores de Sogama e do polígono do Acevedo; ou para os visitantes do parque acuático
• Trátase dunha estrada na que se levarán a cabo obras de ensanche e de acondicionamento ao longo dun treito de 7 km, unha vez que desde a Xunta se ten asumido a súa titularidade
• Realizarase unha ampliación da calzada ata acadar un ancho de 9 metros, aumentando os dous carrís e construíndo beiravías nas dúas marxes, inexistentes nestes momentos
• Renovarase o firme e melloraranse as interseccións, habilitando carrís de aceleración e desaceleración para favorecer as incorporacións; e semiglorietas que faciliten os cambios de sentido; e unha rotonda no acceso a Sogama

A conselleira de Infraestruturas e Vivenda, Ethel Vázquez, xunto co delegado territorial da Xunta na Coruña, Ovidio Rodeiro, e o alcalde de Ordes, José Luís Martínez, supervisou hoxe o inicio das obras de mellora da estrada que vai de Ordes a Cerceda, por Mercurín, que rematarán o vindeiro ano.

Vázquez Mourelle explicou que esta actuación, na que o Goberno galego inviste 2,3 millóns de euros, achegará comodidade e seguridade nos desprazamentos dos veciños de Ordes e Cerceda; dos traballadores que se desprazan a diario ata Sogama ou ás empresas do polígono do Acevedo; ou para os que se achegan a desfrutar do parque acuático, sobre todo no verán. 

Este proxecto reforzará a seguridade viaria, favorecerá a mobilidade e suporá unha maior comodidade nos desprazamentos de veciños e usuarios que transitan por esta estrada.

Trátase dunha estrada na que se levarán a cabo obras de ensanche e de acondicionamento ao longo dun treito de 7 km, unha vez que desde a Xunta se ten asumido a súa titularidade. Concretamente, vaise ampliar a calzada ata acadar un ancho de 9 metros, aumentando os dous carrís e construíndo beiravías nas dúas marxes, inexistentes nestes momentos.

O obxectivo das obras é acadar un ancho máis adaptado ás necesidades de mobilidade da zona, na que predomina o tráfico de vehículos pesados, xa que esta estrada constitúe un dos principais accesos para as empresas situadas no parque empresarial do Acevedo, en Cerceda, e mesmo para o vertedoiro de Sogama . 

Tamén se renovará o firme e melloraranse as principais interseccións, habilitando carrís de aceleración e desaceleración para favorecer as incorporacións en determinados puntos; e semiglorietas que faciliten os cambios de sentido en condicións seguras; así como unha rotonda no acceso ao vertedoiro de Sogama, para permitir os xiros e todos os movementos coas máximas garantías de seguridade.