A Mancomunidade organiza esta semana a primeira sesión presencial sobre autoemprego e cooperativismo  

Terá lugar en Ordes este mércores e será inaugurada por Covadonga Toca, secretaria xeral de Emprego. A actividade tamén se desenvolverá nos demais concellos da comarca ao longo de todo o mes de setembro
A Oficina de Fomento Cooperativo da Mancomunidade de Ordes levará a cabo este mércores, 21 de setembro, a primeira das sete sesións presenciais sobre autoemprego e cooperativismo. Esta terá lugar de 9.30 a 14.30 horas no salón de plenos do Concello de Ordes, situado na rúa Xoxardo. Nesta sesión inaugural está confirmada a presenza da secretaria xeral de Emprego, Covadonga Toca Carús, así como outros representantes do ente supramunicipal.
     Como principais obxectivos desta  iniciativa formativa destácanse o fomento do autoemprego e do cooperativismo como un modelo empresarial, poñer en contacto a persoas emprendedoras co mundo cooperativo e acompañalas na súa idea de negocio, promover a divulgación e o intercambio de ideas innovadoras, reflexionar sobre a contribución do cooperativismo ao desenvolvemento local, o fomento do uso das TIC, así como dar a coñecer os servizos da Oficina de Fomento Cooperativo da Comarca de Ordes. Tamén está prevista unha mesa de experiencias cooperativistas na cal participarán as firmas Erica-mel,  Nova Aseconia e  Cestola na Cachola.
     Todas estas sesións están especialmente dirixidas a persoas desempregadas, emprendedoras, institucións públicas e privadas e, en xeral, todas as persoas interesadas. A asistencia, que a día de hoxe supera as 25 asistentes, é de balde e desenvolverase en cada un dos sete concellos da comarca. As persoas que queiran participar están a tempo de inscribirse a través do 981680002 ou ben presencialmente na mesma Oficina de Cooperativismo situada nas dependencias da Mancomunidade de Ordes (rúa Xoxardo, Ordes).
     Ademais da de Ordes tamén están confirmadas as seguintes datas nos demais concellos da comarca ao longo de todo o mes de setembro: Cerceda, día 22; Tordoia, día 23; Trazo, día 26; Frades, día 27; Oroso, día 28; Mesía, día 30.